صناعة السفن في رشيد.. تاريخ عريق وإبداع يسابق التطور

 

في مدخل متحف السويس القومي فيه مركب موجودة في مكان أشبه بحمام السباحة أو النافورة.

مركب قديم من مراكب عصر الملكة حتشبسوت، لكنها في الحقيقة مجرد نموذج طلبه صناع أفلام تسجيلية فرنساويين معروفين، انه يتصنع في مدينة رشيد بنفس الطريقة اللي صنع بيها المصري القديم أسطوله اللي كان بيجوب بيه البحار.

صناع الفيلم الفرنساويين إختاروا رشيد تحديدا لإنها مدينة صناعة المراكب في مصر من قديم الزمان، وكان هدفهم من صناعة المركب هو اثبات قدرة المصريين على التجارة مع بلاد بونت زي ما بيقول التاريخ في البرديات.

رشيد من مدن محافظة البحيرة عمرها من عمر التاريخ، وجزء من أهلها هم ملوك صناعة المراكب في العالم، عندهم صنعة وحرفة عظيمة ارتبطت بصناعة المراكب بسبب موقعها الخرافي على فرع رشيد من النيل من ناحية وعلى البحر المتوسط من الناحية التانية.

يعني بتطل على العذب والمالح في نفس الوقت، وبتعمل مراكب للنيل وللبحر من قديم الزمان وتقدر بكل ثقة تقول عن نفسها "مين زينا".

رشيد "مدينة الألف نخلة" هي مركز صناعة المراكب، باعتبارها من من أقدم الحرف هناك، واللي اتحولت مع مرور الوقت لصناعة عظيمة بيشتغل فيها مئات الورش بيشتغل فيها أكتر من 20 ألف  بحراوي على الأقل متوزعين على أكتر من 50 ورشة.

بتشتغل في ايه الورش دي؟

ورش رشيد اللي فيها صنايعية ايديهم تتلف في حرير بتصنع المراكب سواء كانت مراكب صغيرة أو عملاقة، وفيها ورش متخصصة في التصليح وتجارة قطع الغيار، وورش تانية بتتاجر في خردة المراكب والسفن.

مراكب وسفن الصيد والسياحة وسفن الدعم والاسناد لشركات الخدمات البترولية.

بس كده؟

لأ طبعا.

في رشيد ورش بتصنع أفخم وأبدع اليخوت على مستوى ينافس صناعة اليخوت في العالم كله.

طب جه منين الأصل التاريخي لتخصص رشيد في صناعة السفن تحديدا؟

صناعة المراكب في رشيد البعض بيقول انها بدايتها بترجع للعصر العثماني في مصر اللي كان حكامه شايفين رشيد هي المكان المناسب اللي يقدروا يعتمدوا عليه عشان يورد الصنايعية اللي يشتغلوا في المراكب السلطانية.

وده لان رشيد كان فيها صنايعية شطار  شغالين على مراكب الصيد، والصيد كان الحرفة الاساسية لأهل رشيد، وفي نفس الوقت هي قريبة من مركز الدولة العثمانية.

عشان كده كان كل سنة بييجي فرمان من الباب العالي لمحافظ رشيد يأمره انه يبعت عدد من صناع السفن يروحوا السويس يشتغلوا على المراكب السلطانية، وده حول الحرفة في رشيد لإحتراف وبدأت تتوسع صناعة السفن بعد دخول ورش الحدادة كمان وبداية تجارة قماش الأشرعة والقلوع الكتان المطلوبة للمراكب واللي كان بتيجي من المنوفية والغربية، وبمرور الوقت بقت سمعة مراكب رشيد بتنافس ورش المراكب في دمياط والإسكندرية.

تمر السنين والصنايعية الشطار يورثوا صنعتهم لولادهم ويطوروا من مهاراتهم.

ولما تزور رشيد وتركز على ورش صناعة المراكب والسفن واليخوت هتلاقيها عاملة زي خلية النحل بطول سواحلها على النيل والبحر المتوسط، طبعا هي اسمها ورش لكنها في الحقيقة أقرب للمصانع الكبيرة اللي بتشغي بالصنايعية الشطار اللي بينتجوا مراكب الصيد وصنادل نقل البضايع في النيل والسفن الكبيرة اللي بتشتغل في النقل البحري ودي سفن عملاقة، ده غير ورش الفلايك  الصغيرة.

يعني في رشيد هتلاقي طلبك مهما كان لو انت أهل البحر.

من أول التصميم للصناعة للتقفيل والفرش.

وطبعا انتاج مراكب رشيد بيتصدر لبعض الدول العربية والأوربية سواء كانت من خشب أو من حديد.

أهل رشيد في صناعة السفن محدش زيهم، لإنهم حافظوا على صنعتهم وطوروها ووصلوا لصناعة اليخوت الكبيرة اللي بملايين الدولارات واللي بتجمع ما بين الرفاهية والمتانة.

عايز أرجع بيكم بقى لقصة نموذج سفينة حتشبسوت اللي موجود في مدخل متحف السويس القومي، واللي اتبنت في رشيد بناء على طلب مخرج فرنساوي حب يصور فيلم تسجيلي عن مركب الملكة حتشبسوت ورحلتها إلى بلاد بونت، واشترطوا ان السفينة تتعمل على نمط السفن المصرية القديمة وبنفس مقاييسها، وتنزل البحر فعلا وتوصل لحد جنوب البحر الأحمر عشان تثبت النظريات التاريخية اللي بتقول ان قدماء المصريين وصلوا فعلا لبلاد بوُنت اللي المفروض انها في شرق إفريقيا وبعض العلماء بيقولوا انها الصومال.

تخيلوا الطلب ده اتنفذ في رشيد اللي كان فيها فنانين عملوا مركب شبه السفن المصرية القديمة بالظبط بطول 20 متر وعرض 5 متر وبخشب زي خشب الأرز وتقدر تشيل حمولة 17 طن بنفس طريقة بنا المراكب من الخشب المتداخل على اللي بيسموها "عاشق ومعشوق" وبشراع كبير 15 متر وفعلا مركب حتشبسوت في نسخته الرشيدي راحت رحلتها في البحر الأحمر بالشراع والمجاديف ورجعت تاني ولا كإننا في عصر الملكة المصرية وفي رحلتها العظيمة.

وده لإنها اتعملت على ايد صنايعية ملهمش زي في رشيد بلد التاريخ ومقاومة الاحتلال والحضارة والايد اللي تتلف في حرير.